Tuesday, August 13, 2019

పువ్వులలో జ్వాల లెగసి బొబ్బలు పుట్టెన్

కందిశంకరయ్యగారు నేడు ఇచ్చిన సమస్య

పువ్వులలో జ్వాల లెగసి బొబ్బలు పుట్టెన్

నా పూరణ

దివ్వెల పండుగ వచ్చెను
నవ్వులు చల్లగ చిలికెను నలుదిశలందున్
జువ్వలు రేగెన్ కాకర
పువ్వులలో జ్వాల లెగసి బొబ్బలు పుట్టెన్

Sunday, August 11, 2019

దత్తపది - కాక తాత పాప మామ

కాక, తాత, పాప, మామ - రామాయణార్థంతో స్వేచ్ఛాఛందంలో పద్యం. శంకరాభరణం బ్లాగులో నేటి దత్తపది.

స్థితప్రజ్ఞుఁడు రాముఁడు

సీ. కైక కోరికవల్ల కాకపోయెను వేడ్క , కడ కేఁగ వలసెను కానలకును
తాతతాతది యవతారమె చూడంగ, తాతవేలుపు వ్రాత తప్పలేదు
శాప మేనాటిదో పాపమవ్విధమున, నేలపట్టి నడచెఁ గాలిబాట
మామక మనుకున్న కామితభోగముల్, చేజారిపోయెను చిటికెలోన

తే. ఇన్ని కష్టముల్ జనియించె నిన కులునకు
నైన నావంత కోపమ్ముఁ బూన డతఁడు
కొండకోనల తిరుగాడుచుండి కూడ
చిరునగవు మోమున నొకింత చెరుగ దెపుడు

తాతతాత - విష్ణువు
తాతవేలుపు - బ్రహ్మ
మామకము - నాది

Friday, August 9, 2019

కలిమి తొలంగినప్పుడె సుఖమ్ము లభించు మానవాళికిన్

నేడు ఆకాశవాణిలో ప్రసారం చేసిన సమస్య - దానికి నా పూరణ

చ. తలకొనుదెంచు లాభములు తప్పుడుచేతల ధాన్యరాశులున్
చిలువలు పల్వలై పెరిగి చేతికి నల్ల ధనంబు చిక్కగా
నెలకొను బాధలెన్నియొ వినిర్మలమౌ గతి నెంచిపోవ యా
కలిమి తొలంగినప్పుడె సుఖమ్ము లభించును మానవాళికిన్

Thursday, August 8, 2019

లలనలు సేయఁదగదు వరలక్ష్మీ వ్రతమున్

నేడు శ్రావణ శుక్రవారము. ఆ సందర్భముగా కంది శంకరయ్యగారు ఇచ్చిన సమస్య ఇది.

లలనలు సేయఁదగదు వరలక్ష్మీ వ్రతమున్

నా పూరణ.

సులభముగా దేవి కరుణ
కలుగుట కొక్క విధ మరయగ స్థిరము భువిపై
వెలిగెను, శ్రావణ మం దే 
లలనలు సేయఁదగదు వరలక్ష్మీ వ్రతమున్?

మాతను తన పతిగఁ గొని యుమాసతి మురిసెన్

కంది శంకరయ్యగారు నేడు ఇచ్చిన సమస్య ఇది

మాతను తన పతిగఁ గొని యుమాసతి మురిసెన్


నా పూరణ
భూతేశుని ఫాలాక్షుని
యా తెల్లనిదొర పశుపతి యసమాక్షుని సం
ప్రీతుని నాట్యకళాని
ర్మాతను తన పతిగఁ గొని యుమాసతి మురిసెన్

భూతేశుడు, ఫాలాక్షుడు, తెల్లనిదొర, పశుపతి, అసమాక్షుడు - ఇవి శివునికి పేర్లు.  ఆయననే నటరాజు అంటారు కదా, అదే రీతిలో నాట్యకళానిర్మాత అని సంబోధించాను. 


Tuesday, August 6, 2019

మూఁడేఁడుల పిల్లకొక్క పుత్రుఁడు గలిఁగెన్

శంకరాభరణం బ్లాగులో నేటి సమస్య ఇది

మూఁడేఁడుల పిల్లకొక్క పుత్రుఁడు గలిఁగెన్

నా పూరణ

ఈడు పదునెనిమిది కలుగ
యాడపడుచు బెండ్లి జరిగె నటుపై జరిగెన్
మూఁడేడుల సంసారము
మూఁడేఁడుల పిల్లకొక్క పుత్రుఁడు గలిఁగెన్

Monday, August 5, 2019

కల్లోలము సాగుటొప్పు కాశ్మీరమునన్

రాజ్యాంగాధికరణము ౩౭౦ రద్దు చేసిన మోదీ ప్రభుత్వం. దానిపై కంది శంకరయ్య గారి సమస్య

కల్లోలము సాగుటొప్పు కాశ్మీరమునన్

నా పూరణ -

కం. కల్లల సమయం బుడిగెను
తెల్లముగా ప్రజకుఁ నేడు దెలిసెను దేశం
బెల్లను కలయుట కించుక
కల్లోలము సాగుటొప్పు కాశ్మీరమునన్